Kurti flet për dorëheqjen e Aliut, punimin e Bashës dhe lavdëron Rashiqin
Kryeministri në detyrë i Kosovës, Albin Kurti, ka komentuar sot për herë të parë dorëheqjen e ish-ministrit të Infrastrukturës, Liburn Aliu, si dhe polemikat rreth punimit akademik të vitit 2012, ku kryeparlamentari i ri, Dimal Basha, ishte bashkautor me profesoreshën Jana Arsovska.
Punimi në fjalë është përmendur shpesh për shkak të pretendimeve se Ushtria Çlirimtare e Kosovës kishte bashkëpunuar me grupe kriminale dhe me para droge. Kurti u rreshtua krah Bashës, duke thënë se sqarimet e dhëna nga ai ditë më parë mjaftojnë.
“Ai e ka dhënë sqarimin për atë publikim që është bërë para më shumë se një dekade dhe aty ka treguar se kapitulli që e ka shkruar ai nuk ka asgjë të bëjë me Ushtrinë Çlirimtare të Kosovës. Edhe njëherë ka shprehur vlerësimet më të larta për UÇK-në”, tha Kurti.
Kryeministri në detyrë shtoi se problemet e Kosovës nuk vijnë nga një artikull akademik, por nga vendimet politike të qeverive të kaluara.
“Problemet i kemi kur është nënshkruar Zajednica, kur janë amnistuar kriminelët serbë, kur është votuar gjykata speciale, kur është themeluar Lista Serbe në bashkëpunim me Beogradin, kur politikanët e Kosovës kanë bërë qeveri duke u varur nga kjo parti, kur kanë hyrë në pazare për ndarjen e Kosovës, e jo ky far artikulli ku manipulohet një pjesë e tekstit”, theksoi ai.
Pa e uruar Bashën për marrjen e postit të kryeparlamentarit, Kurti u ndal më shumë tek Nenad Rashiq, për të cilin tha se është shembull i integrimit.
“Nenad Rashiq e pranon Republikën e Kosovës, punon për institucionet e shtetit tonë dhe është ministri që ka bërë më së shumti për komunitetin serb në vendin tonë”, u shpreh Kurti.
I pyetur për dorëheqjen e Liburn Aliut pas zgjedhjes së Bashës kryetar të Kuvendit, Kurti dha një përgjigje të shkurtër:
“E falënderoj ish-ministrin për kontributin. Ne duhet të vazhdojmë përpara, pa humbur kohë e kam emëruar në këtë detyrë zëvendësministrin Hysen Durmishi”.
Këto deklarata Kurti i bëri në Fushë-Kosovë, gjatë inaugurimit të një kopshti për fëmijë dhe vendosjes së gurthemelit të një shkolle të re.
